سورۂ ذارِیات کاتعارف

مقامِ نزول:

سورۂ ذارِیات مکہ مکرمہ میں نازل ہوئی ہے۔( خازن، تفسیر سورۃ الذّاریات، ۴ / ۱۸۰)

رکوع اورآیات کی تعداد:

اس سورت میں 3رکوع اور60 آیتیں ہیں ۔

’’ذارِیات ‘‘نام رکھنے کی وجہ :

ذارِیات کا معنی ہے خاک بکھیر کر اُڑا دینے والی ہوائیں ،اور اس سورت کی پہلی آیت میں اللہ تعالیٰ نے ان ہواؤں کی قسم ارشاد فرمائی ہے ا س مناسبت سے ا س کا نام’’سورۂ ذارِیات‘‘ رکھا گیا۔

سورۂ ذارِیات کے مضامین:

اس سورت کا مرکزی مضمون یہ ہے کہ اس میں اسلام کے بنیادی عقائد جیسے توحید، نبوت ، اور مرنے کے بعد دوبارہ زندہ کئے جانے کو ثابت کیا گیا ہے اور اس کے مخالف چیزوں جیسے شرک،نبوت کی تکذیب اور حشر و نشر کے انکار کی نفی کی گئی ہے،اور اس سورت میں یہ چیزیں بیان کی گئی ہیں ۔

(1)…اس سورت کی ابتدائی آیات میں کفارِ مکہ کے اَحوال بیان کئے گئے کہ وہ قرآنِ مجید،آخرت اور جہنم کے شدید عذاب کو جھٹلاتے ہیں اسی طرح مُتّقی مسلمانوں کے اَحوال اور ان کے لئے تیار کی گئی جنت کی نعمتیں بیان کی گئیں تاکہ عقلمند انسان ان دونوں میں فرق سمجھ سکے اور اسے عبرت و نصیحت حاصل ہو ۔

(2)…کفارِ مکہ کی طرف سے پہنچنے والی اَذِیَّتوں پر نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ اور صحابہ ٔکرام رَضِیَ اللہ تَعَالٰی عَنْہُمْ کوتسلی دینے کے لئے پچھلے انبیاء ِکرام عَلَیْہِمُ الصَّلٰوۃُ وَالسَّلَام اور ان کی امتوں کے واقعات بیان کئے گئے ۔

(3)…اللہ تعالیٰ نے اپنی قدرت اور وحدانیَّت کے دلائل ذکر فرمائے اور کسی کو اللہ تعالیٰ کا شریک قرار دینے، اللہ تعالیٰ کے رسولوں کی تکذیب کرنے سے منع فرمایا اور حضورِ اقدس صَلَّی اللہ تَعَالٰی عَلَیْہِ وَاٰلِہٖ وَسَلَّمَ کو حکم دیاکہ منکرین سے منہ پھیر لیں اور مُتّقی لوگوں کو نصیحت کریں ۔

(4)…اس سورت کے آخر میں جِنّات اور انسانوں کی تخلیق کا مقصد بیان کیا گیا کہ انہیں پیدا کرنے سے مقصود یہ ہے کہ یہ اللہ تعالیٰ کی معرفت حاصل کریں اوراخلاص کے ساتھ صرف اسی کی عبادت کریں اور یہ بتایاگیا کہ تمام مخلوق کا رزق اللہ تعالیٰ نے اپنے ذمہ ٔکرم پر لیا ہو اہے،نیز کفار و مشرکین سے قیامت کے دن شدید عذاب کا وعدہ کیا گیا اور انہیں دنیا میں سابقہ امتوں جیساعذاب نازل ہونے سے ڈرایا گیا ہے۔

سورۂ قٓ کے ساتھ مناسبت:

سورۂ ذارِیات کی اپنے سے ماقبل سورت ’’ قٓ ‘‘ کے ساتھ ایک مناسبت یہ ہے کہ سورۂ قٓ کے آخر میں مرنے کے بعد دوبارہ زندہ کئے جانے اور اعمال کی جزاء و سزا ملنے کا ذکر کیا گیا اور سورۂ ذارِیات کی ابتداء میں قسموں کے ساتھ فرمایاگیا کہ لوگوں سے جو وعدہ کیا گیا ہے یہ سچاہے اور اعمال کی جزاء یا سزا ضرور ملے گی ۔ دوسری مناسبت یہ ہے کہ سورۂ قٓ میں جن انبیاء ِکرام عَلَیْہِمُ الصَّلٰوۃُ وَالسَّلَام کا اِجمالی طور پر ذکر ہوا ان کا سورۂ ذارِیات میں تفصیل کے ساتھ ذکر کیا گیا ہے۔