سورۂ سجدہ کا تعارف

مقامِ نزول:

سورۂ سجدہ آیت نمبر18 ’’اَفَمَنْ كَانَ مُؤْمِنًا‘‘ سے شروع ہونے والی تین آیتوں کے علاوہ مکیہ ہے۔(خازن، تفسیر سورۃ السجدۃ، ۳ / ۴۷۵)

رکوع اورآیات کی تعداد:

اس سورت میں 3 رکوع اور 30 آیتیں ہیں ۔

’’سجدہ ‘‘نام رکھنے کی وجہ :

اس سورت کی آیت نمبر15میں ان مسلمانوں کا وصف بیان کیا گیا ہے جو قرآنِ پاک کی آیات سن کر الله تعالیٰ کی تسبیح کرتے اوراس کی بارگاہ میں سجدہ ریز ہوتے ہیں ،اس مناسبت سے ا س سورت کا نام ’’سورۂ سجدہ‘‘ رکھا گیا۔

سورۂ سجدہ کے فضائل:

(1)…حضرت ابو ہریرہ رَضِیَ اللہ تَعَالٰی عَنْہُ فرماتے ہیں :نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ جمعہ کے دن فجر کی نماز میں سورۂ سجدہ اور سورۂ دَہر کی تلاوت فرمایا کرتے تھے۔( بخاری، کتاب الجمعۃ، باب ما یقرأ فی صلاۃ الفجر یوم الجمعۃ، ۱ / ۳۰۸، الحدیث: ۸۹۱)

(2)…حضرت جابر رَضِیَ اللہ تَعَالٰی عَنْہُ فرماتے ہیں کہ نبی اکرم صَلَّی اللہ تَعَالٰی عَلَیْہِ وَاٰلِہٖ وَسَلَّمَ اس وقت تک نیند نہ فرماتے جب تک سورۂ سجدہ اور سورۂ ملک کی تلاوت نہ فرما لیتے ۔( ترمذی، کتاب الدعوات، ۲۲-باب منہ، ۵ / ۲۵۸، الحدیث: ۳۴۱۵)

(3)…حضرت خالد بن معدان رَضِیَ اللہ تَعَالٰی عَنْہُ فرماتے ہیں ’’نجات دلانے والی سورت کو پڑھا کرو اور وہ سورت ’’الٓمّٓۚ(۱) تَنْزِیْلُ‘‘ ہے۔ مجھے یہ حدیث پہنچی ہے کہ ایک شخص صرف ا سی سورت کی تلاوت کیا کرتا تھا اور وہ بکثرت گناہ بھی کرتا تھا۔ (اس شخص کے انتقال کے بعد) اس سورت نے ا س کے اوپر اپنے پر پھیلا دئیے اور کہا’’اے میرے رب! عَزَّوَجَلَّ،اس کی مغفرت فرما دے ،کیونکہ یہ کثرت سے میری تلاوت کیا کرتا تھا۔ الله تعالیٰ نے ا س شخص کے بارے میں اس سورت کی شفاعت قبول فرما لی اور فرمایا’’اس کے ہر گناہ کے بدلے میں ایک نیکی لکھ دو اور اس کا ایک درجہ بلند کر دو۔( سنن دارمی، کتاب فضائل القرآن، باب فی فضل سورۃ تنزیل السجدۃ وتبارک، ۲ / ۵۴۶، الحدیث: ۳۴۰۸)

سورۂ سجدہ کے مَضامین:

اس سورت کامرکزی مضمون یہ ہے کہ مشرکین مرنے کے بعد دوبارہ زندہ کئے جانے کا انکار کرتے تھے اور اس سورت میں بطورِ خاص مرنے کے بعد دوبارہ زندہ کئے جانے کو ثابت کیا گیا ہے۔نیز اس سورت میں یہ چیزیں بیان کی گئی ہیں ۔

(1)…اس سورت کی ابتداء میں یہ بیان کیاگیا کہ قرآن الله تعالیٰ کی وہ کتاب ہے جو اس نے اپنے حبیب صَلَّی اللہ تَعَالٰی عَلَیْہِ وَاٰلِہٖ وَسَلَّمَ پر نازل فرمائی اور اس چیز میں شک کی کوئی گنجائش نہیں ۔

(2)…نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ کی رسالت کو ثابت کیا گیا اور مشرکین کے اس نظریے کا رد کیا گیا کہ قرآن حضورِ اقدس صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے اپنی طرف سے بنا لیا ہے ۔

(3)… الله تعالیٰ کی وحدانیّت اور قدرت پر دلائل ذکر کئے گئے ۔

(4)…کفاراورفرمانبردارمسلمانوں کا حال بیان کیا گیا کہ قیامت کے دن کافر ذلت و رسوائی کا سامنا کریں گے، نیک اعمال کرنے کی خاطر دنیا میں لوٹ جانے کی تمنا کریں گے اور وہ دردناک عذاب چکھیں گے جبکہ مسلمان چونکہ دنیا میں راتوں کو الله تعالیٰ کی عبادت کرتے تھے، خوف اور امید رکھتے ہوئے اپنے رب عَزَّوَجَلَّ کو پکارتے تھے، الله تعالیٰ کی رضا حاصل کرنے کی نیت سے اپنے مال راہِ خدا میں خرچ کرتے تھے ، اس لئے آخرت میں انہیں ان کے اعمال کی جزاء عظیم ثواب کی صورت میں ملے گی، الله تعالیٰ کا فضل دیکھ کر ان کی آنکھیں ٹھنڈی ہوں گی اور انہیں جنت میں ہمیشہ کے لئے داخلہ نصیب ہو گا۔

(5)…یہ بتایا گیاہے کہ کفار اور مسلمانوں کا انجام ایک جیسا نہیں ہے۔

(6)… تاجدارِ رسالت صَلَّی اللہ تَعَالٰی عَلَیْہِ وَاٰلِہٖ وَسَلَّمَ اور حضرت موسیٰ عَلَیْہِ الصَّلٰوۃُ وَالسَّلَام کی رسالت کے درمیان مشابہت بیان کی گئی ہے۔

(7)…انبیاء ِکرام عَلَیْہِمُ الصَّلٰوۃُ وَالسَّلَام کو جھٹلانے والی سابقہ امتوں پر نازل ہونے والے عذاب کا ذکر کر کے اس امت میں سے رسولِ کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ کو جھٹلانے والوں کو ڈرایا گیا ہے۔

(8)…اس سورت کے آخر میں اسلام کے بنیادی عقائد،توحید،رسالت اور حشر و نشر پر کلام کیاگیا ہے۔

سورۂ لقمان کے ساتھ مناسبت:

سورۂ سجدہ کی اپنے سے ماقبل سورت ’’لقمان‘‘ کے ساتھ مناسبت یہ ہے کہ سورۂ لقمان میں جن پانچ مخصوص غیبی چیزوں کے ذاتی علم کا الله تعالیٰ کے ساتھ خاص ہونا بیان کیاگیا ان پا نچ چیزوں کی تشریح سورۂ سجدہ میں کی گئی ہے۔( تناسق الدرر، سورۃ السجدۃ، ص۱۱۱، ملخصاً)