سورۂ وَالتِّیْنْ کا تعارف

مقامِ نزول:

سورۂ  وَالتِّیْن مکہ مکرمہ میں نازل ہوئی ہے۔ (خازن، تفسیر سورۃ والتین، ۴ / ۳۹۰)

رکوع اور آیات کی تعداد:

اس سورت میں 1رکوع اور 8آیتیں ہیں ۔

’’ وَ التِّیْنْ ‘‘نام رکھنے کی وجہ :

انجیر کو عربی میں اَلتِّیْنْ کہتے ہیں ،اور اس سورت کی پہلی آیت میں اللّٰہ تعالیٰ نے انجیر کی قسم ارشاد فر مائی ہے اس مناسبت سے اسے ’’سورۂ وَ التِّیْن ‘‘ کہتے ہیں ۔

سورۂ وَ التِّیْن سے متعلق حدیث:

حضرت براء بن عازب رَضِیَ اللّٰہُ تَعَالٰی عَنْہُ فرماتے ہیں :میں نے عشاء کی نماز میں حضورپُر نور صَلَّی اللّٰہُ تَعَالٰی عَلَیْہِ وَاٰلِہٖ وَسَلَّمَ کو ’’وَ التِّیْنِ وَ الزَّیْتُوْنِ‘‘ کی تلاوت کرتے ہوئے سنا،میں نے آپ صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ سے زیادہ اچھی آواز کے ساتھ قراء ت کرتے ہوئے کسی کو نہیں سنا۔( بخاری، کتاب التوحید، باب قول النبی صلّی اللّٰہ علیہ وسلّم الماہر بالقرآن... الخ، ۴ / ۵۹۳، الحدیث: ۷۵۴۶)

سورۂ وَ التِّیْنْ کے مضامین:

اس سورت کا مرکزی مضمون یہ ہے کہ اس میں انسان اور اس کے عقیدے سے متعلق کلام کیا گیا ہے اور اس میں یہ مضامین بیان ہوئے ہیں :

(1)…اس سورت کی ابتداء میں اللّٰہ تعالیٰ نے انجیر،زیتون،مبارک پہاڑ طورِ سینااور امن والے شہر مکہ مکرمہ کی قسم کھا کر ارشاد فرمایا کہ بیشک ہم نے آدمی کو سب سے اچھی صورت میں پیدا کیا ہے۔

(2)…یہ بتایاگیا کہ اگر آدمی نے اللّٰہ تعالیٰ کی وحدانیّت کا اقرار نہیں کیا اور نبی کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ کی تصدیق نہ کی تو اسے جہنم کے سب سے نچلے طبقے میں ڈال دیا جائے گا اور جن لوگوں نے اللّٰہ تعالیٰ کو واحد معبودمانا، اس کے حبیب صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ کی تصدیق کی اور انہوں نے اچھے کام کئے تو ان کیلئے بے انتہاء ثواب ہے۔

(3)…اس سورت کے آخر میں مرنے کے بعد دوبارہ زندہ کئے جانے اور حساب و جزاء کا انکار کرنے والے کی مذمت بیان کی گئی ہے۔

سورۂ اَلَمْ نَشْرَحْ کے ساتھ مناسبت:

سورۂ وَ التِّیْنْ کی اپنے سے ما قبل سورت ’’اَلَمْ نَشْرَحْ‘‘ کے ساتھ مناسبت یہ ہے کہ سورۂ اَلَمْ نَشْرَحْ میں تخلیق اور خُلق کے اعتبار سے سب سے کامل انسان کی شخصیت اور سیرتِ مبارکہ بیان کی گئی اور اس سورت میں نوعِ انسانی کا حال بیان کیا گیا ہے۔